Best Vörutsetten bi´t 8. Kanalswemmen: Haast keen Wulk an´t Hemel, blot bietje Wind un een strahlend Sünn, de sük mooi in´t Polder spegelt hett. Aver ok all anner is good mitlopen, twee Motorbootjes to´t utdoon van de Bojen, 8 Bootjes as Geleid an de Swemmstreek, mennig Helpers mit good Luun un as alltied  een barendvullen Koffjetafel mit smakelk Koken,Geback, Snoperee, Tee un Koffje.
Disse Jahr harren wi ruugweg 20 Swemmer an´t Start, waarvan anto 10 Nörders daarbie wassen, daarunner een Swemmer ut de egen Nawass-Ofdelen. Unner de Deelnehmers weren ok negen Swemmer, de dat erst Maal an de Veranstalten deelnahmen hebben.
Na een körten Anspraak van Cox, in de he de Starter verklart hett, welke Richt se swemmen sulen un wat de verscheden Farven van de Bojen to bedüden harn, gungt in´t Water. Cox Woorden, dat dat keen Weddstried is, weren daar all weer vergeten un elk un een hett losleggt, as wenn de Blixem achter hum an seet.
Over 5000 m hett Sven all annern wesen, waar de Hark up´t Steel steiht un bi de 3000 m kun Thomas sük dörsetten. För Holger gung dat na 5000 m swemmen wieder na Leer, waar he an´t Vull Watt Manns Loop mitdoon hett. Francesco harr noch dat Stabi-Training van Cox in´t Knoken un kunn de darde Stee bi 3000 m neet halen. Herro kunnen wi na 2000 m ohn Pien to´t Water uthalen.  Teo hett bi 1000 m een gooden Tied henleggt.                                                                                                                      Bi de Froolüü was Regina over 2000 m toeerst weer in´t Ziel. Juliane hett sük bi 3000 m een bietje verdoon un is an de Kehr vörbi swummen un muss de anners trecken laten. Nicole is ohn Neo an`t Start gaan un is na 500m verklömt ut Water klautert.
Achteran kregen de Helpers een Roos in Vereensklöör of en Glückskookje mit een plattdüütse Sprööck un för de Deelnehmer gaff noch een Urkunn daarbi.
Bi Tee, Koofje, Kok un frünelk Prootjes hebben wi de Veranstalten unklingen laten un freien uns nu all up dat 9. Kanalswemmen.