[Bericht van Gerd "Cox" Wolken]

An Sönndag de 15.08.2021 kwammen ruugweg 20 Swemmer binanner um an uns Kanalswemmen deeltonehmen. So as elke Jahr gung dat för uns Triathleten na Leypuchtpolder um sük mit anner Verenen ut Auerk, Hannover, Haag, Nörderney un Ollenbörg bit Swemmweddstriet to meten. Wi harren Ennen van twee bit fief Kilometer anboden.

S´Mörgens um Klock acht hebben sük de eersten Helpers truffen, um de Streeken to makeren. Uns Üpperste Günther is mit een Motorbootje van Nörden kamen. Up sien Tour heet dat so düchtig gallert, dat hum d  Water to´t Piepen utleep. An d Kurbelpünt is Herro daarto stegen un de beiden hebbt de Bojen heel akkraat int Deep un in´t Polder verdeelt. As Bojen denen uns Pezziballen in verscheden Farven. Wi wussen ut de verleden Jahren, dat de eerste Boje sowat um 100 m van´t Pünt utsett worden mutt. De tweede muss een Ofstand van 1000 m to de eerste hebben un der darde noch maal 500 m wieder. De annern dree Bojen wurrn as Dreekant in´t Polder verdeelt, de Dreekantkurs was 500 m lang. In de Tüschentied heet Gralf sien Wohnmobil upstellt un dat Paddelbootje torecht makt.

Na un na kwammen de Lüü und so kunn Cox um even för half Teihn all Delnehmers, Gasten un Helpers begröten. He wuss over haast elk un een, een Dööntje to verteelen.
So tegen half Teihn sull dat losgahn, man vördeem dat dat losgahn kunn, wurr de Swemmers noch verklart, dat se toeerst twee Runnen in´t Dreekant swemmen mussen un van dor ut in´t Kanal bit na de Bojen in de verscheden Farven. Van dor ut gung dat direkt weer anner Kant an, liek up´t Paddel un Pedal Station d´rup daal. Dor wurr van Christina un Petra de Tied nahmen un an Enn ok utweert. Ralf heet de Swemmer bit utstiegen hulpen, wiel de een of anner wacklig up´t Beenwark weer.

As all Swemmer weer seker an´t Land wassen, gaff dat för de Swemmer een Urkunn und för de Froolüü noch een Blööm daarto. Daarna stunnen wi all bi Koffje, Tee und Kook binanner un hebben de Veranstalten mooi utklingen laten.

Weest all bedankt för jo Mitdoon und bit anner Jahr.